ચેન્નાઈની એક ખાનગી હોસ્પિટલમાં સફળ સર્જરી કરાવનાર પાકિસ્તાની કિશોરી આયેશામાં હવે એક ભારતીયનું હૃદય ધડકે છે. ચેન્નાઈની એક હોસ્પિટલમાં ભારતીય દાતા અને સર્જનો દ્વારા કરવામાં આવેલા સફળ ઓપરેશનને કારણે 19 વર્ષની આયેશાને નવું જીવન મળ્યું. આ પ્રક્રિયા એક ટ્રસ્ટના સૌજન્યથી વિનામૂલ્યે કરવામાં આવી છે.
પાકિસ્તાની પરિવાર ભારત આવીને ખુશ છે :
કરાચીની રહેવાસી આયેશા ફેશન ડિઝાઇનિંગ કરવા માંગે છે. જો ટ્રસ્ટ અને ચેન્નાઈના ડૉક્ટરો તેમની મદદે ન આવ્યા હોત તો આયેશાના પરિવારને સર્જરી પરવડી શકી ન હોત. આયેશાએ કહ્યું કે તે “ટ્રાન્સપ્લાન્ટ પછી સારું અનુભવી રહી છે.” તેની હાલત સ્થિર છે અને તે પાકિસ્તાન પરત જઈ શકે છે. તેની માતાએ ડોકટરો, હોસ્પિટલ અને મેડિકલ ટ્રસ્ટની પ્રશંસા કરી અને દરેક વસ્તુ માટે તેમનો આભાર માન્યો.
આયેશા રાશન છેલ્લા એક દાયકાથી હૃદયની બીમારીથી પીડિત હતી. 2014 માં, તેમણે ભારતની મુલાકાત લીધી જ્યાં તેમના નિષ્ફળ હૃદયને ટેકો આપવા માટે હાર્ટ પંપ લગાવવામાં આવ્યો. કમનસીબે, ઉપકરણ બિનઅસરકારક સાબિત થયું અને ડોકટરોએ તેનો જીવ બચાવવા માટે હાર્ટ ટ્રાન્સપ્લાન્ટની ભલામણ કરી.
જીવ પર ખતરો
ડૉક્ટરોએ જણાવ્યું હતું કે આયશાને હૃદયની ગંભીર બિમારીના કારણે હોસ્પિટલમાં દાખલ કરવામાં આવી હતી. હૃદયની નિષ્ફળતા પછી, ડૉક્ટરોએ તેમને ECMO પર મૂકવું પડ્યું. ECMO એ એવા લોકો માટે જીવન સહાયનું એક સ્વરૂપ છે જેઓ જીવલેણ બીમારી અથવા ઈજાથી પીડાય છે જે હૃદય અથવા ફેફસાના કાર્યને અસર કરે છે. ત્યારબાદ, તેના હાર્ટ પંપના વાલ્વમાં લીક થઈ ગયું હતું, જેને સંપૂર્ણ હાર્ટ ટ્રાન્સપ્લાન્ટની જરૂર હતી, અહેવાલો જણાવે છે.
દિલ્હીથી હાર્ટ ડોનર
ટ્રાન્સપ્લાન્ટનો ખર્ચ 35 લાખ રૂપિયાથી વધુ છે. આયેશાના ઓપરેશનનો આ ખર્ચ ડોક્ટરો અને ટ્રસ્ટે ઉઠાવ્યો હતો. ડૉ. કે.આર. બાલક્રિષ્નને જણાવ્યું હતું કે હૃદય દિલ્હીથી આવ્યું હતું અને યુવતી નસીબદાર હતી. તે અમારી દીકરી જેવી છે એવું તબીબોએ જણાવ્યું હતું.
ટ્રાન્સપ્લાન્ટ પોલિસી સુધારવાની અપીલઃ
ડોક્ટરોએ સરકારને ટ્રાન્સપ્લાન્ટ પોલિસી સુધારવાની અપીલ કરી હતી. તેમનું કહેવું છે કે ટ્રાન્સપ્લાન્ટ સર્જરી પર મોટા પ્રમાણમાં ખર્ચ થવાને કારણે દાનમાં આપેલા ઘણા અંગોનો ઉપયોગ થતો નથી. તેથી નીતિમાં વધુ સુધારો કરવાની જરૂર છે.
SHARE
