કેન્દ્રીય ગૃહ પ્રધાન અમિત શાહે શનિવારે (10 ફેબ્રુઆરી) ના રોજ નાગરિકતા સંશોધન કાયદા (CAA)ને લઈને મોટી જાહેરાત કરી છે. તેમણે કહ્યું કે લોકસભા ચૂંટણી પહેલા CAA લાગુ કરવા માટે નોટિફિકેશન બહાર પાડવામાં આવશે અને તેનો અમલ પણ કરવામાં આવશે. ગૃહમંત્રી અમિત શાહે કહ્યું કે હું સ્પષ્ટ કરવા માંગુ છું કે CAAને કારણે કોઈ પણ વ્યક્તિ નાગરિકતા ગુમાવશે નહીં. તેનો ઉદ્દેશ્ય માત્ર પાકિસ્તાની, અફઘાની અને બાંગ્લાદેશી લઘુમતીઓને નાગરિકતા આપવાનો છે જેઓ ધાર્મિક અત્યાચારનો સામનો કરી રહ્યા છે.
‘આ કોંગ્રેસનું વચન છે’
અમિત શાહે કહ્યું કે કોંગ્રેસ પાર્ટીએ પાડોશી દેશોના દલિત લઘુમતીઓને નાગરિકતા આપવાનું વચન આપ્યું છે. તેમણે કહ્યું કે જ્યારે દેશનું વિભાજન થયું અને ત્યાં લઘુમતીઓ પર અત્યાચાર થયો, ત્યારે તેઓ બધા ભાગીને ભારત આવવા માંગતા હતા, ત્યારે કોંગ્રેસે કહ્યું હતું કે તમે અહીં આવો, તમને અહીંની નાગરિકતા આપવામાં આવશે.
‘વિપક્ષ મુસ્લિમ સમુદાયને ગેરમાર્ગે દોરી રહ્યો છે’
વિપક્ષ પર મુસ્લિમોને ગેરમાર્ગે દોરવાનો આરોપ લગાવતા અમિત શાહે કહ્યું કે CAAને લઈને અમારા મુસ્લિમ ભાઈઓને ગેરમાર્ગે દોરવામાં આવી રહ્યા છે અને ઉશ્કેરવામાં આવી રહ્યા છે. તેમણે કહ્યું કે CAA માત્ર પાકિસ્તાન, અફઘાનિસ્તાન અને બાંગ્લાદેશના ધાર્મિક લઘુમતીઓને નાગરિકતા આપવા માટે છે. શાહે વધુમાં જણાવ્યું હતું કે નરેન્દ્ર મોદી સરકાર દ્વારા રજૂ કરાયેલ CAAનો હેતુ હિન્દુઓ, શીખો, જૈનો, બૌદ્ધો, પારસીઓ અને ખ્રિસ્તીઓ સહિત સતાવણી કરાયેલા બિન-મુસ્લિમ ઇમિગ્રન્ટ્સને ભારતીય નાગરિકતા આપવાનો છે.
SHARE
